د پکتیا ولایت د عدلیې ریاست د حقوقي مرستو نوی آمر معرفي شو
د پکتیا ولایت د عدليې ریاست د حقوقي مرستو نوی آمر مولوي امین الله او نوی حقوقي مرستندوی صورت خان د یاد ریاست کارکوونکو ته وروپېژندل شول.
په هغو مراسمو کې چې په همدغه مناسبت د شوال میاشت په ۷ نېټه د پنجشنبې په ورځ د پکتیا ولایت په عدليې ریاست کې جوړ شوي وو، د پکتیا ولایت د عدليې رئیس مولوي محمد رئیس محمدي، آمرینو او د یاد ریاست کارکوونکو په کې ونډه اخیستې وه.
په دغو مراسمو کې، د عدلیې رئیس د موضوع په تړاو خبرې وکړې او د یاد ریاست د حقوقي مرستو نوی آمر او نوی حقوقي مرستندوی یې د یاد ریاست کارکوونکو ته وروپېژندل. د عدليې رئیس د هغوی تقرر په دغو بستونو کې نوموړو ته مبارکي وویله او زیاته يې کړه چې مسوولیت یو لوی امانت دی چې د اسلامي امارت د مقاماتو لخوا موږ ته سپارل کیږي او موږ یې د الله (ج)، نظام و خلکو پر وړاندې مسوول یو. نو زموږ ټول مسوولین باید د خپلو مسوولیتونو په ترسره کولو کې الله (ج) حاضر او ناظر وګڼي او په خپل ټول توان اسلامي نظام، هیواد او ملت ته خدمت وکړي.
هغه د یاد ریاست له نویو مسوولینو سره د هر ډول همکارۍ ډاډ ورکړ او هغوی ته یې د لوی څښتن تعالی له دربار څخه د ښو خدمتونو د توفیق استدعا وکړه.
په همدې حال کې، د یاد ریاست د حقوقي مرستو آمریت د شوال په ۱۰ نېټه د یکشنبې په ورځ د یاد ولایت د اصلاح په مرکز کې د حقوقي پوهاوي ورکوونې برنامه جوړه کړه.
په دغې برنامه کې، د مدافع وکیل، د مدافع وکیل د ډولونو او په جزايي موضوعاتو کې د مدافع وکیل درلودلو په اړه په دغه مرکز کې د حجز لاندې ماشومانو ته معلومات وړاندې شول.
د پکتیا ولایت د اصلاح مرکز آمر په یاد ولایت کې د حقوقي مرستو د آمریت فعالیتونه وستایل او ویې ویل چې دغه آمریت تل د حجز لاندې ماشومانو ته د پوهاوي ورکوونې او د هغوی د جزايي دوسیو پرمخ وړلو کې لازمې همکارۍ کړې دي.
