د میدان وردک ولایت د عدلیې ریاست اداري ناسته جوړه شوه
د میدان وردک ولایت د عدلیې ریاست اداري ناسته د ۱۴۴۴ هجري قمري کال د روژې میاشت په ۱۷ نېټه د شنبې په ورځ د عدليې رئیس مولوي مطیع الحق عثمان په مشرۍ او د یاد ریاست د آمرینو او کارکوونکو په ګډون جوړه شوه.
دغه ناسته چې ستونزو هوارولو او چارو کې د لازیاتې همغږۍ په منظور جوړه شوې وه، د کلام الله مجید د آیاتونو په تلاوت سره پیل شوه او د عدلیې رئیس په کې د موضوع په تړاو خبرې وکړې او د یاد ریاست کارکوونکو ته یې لارښوونه وکړه چې خپل دندې د دندو له لایحې او د اصولو مطابق ترسره کړي او د یو بل په چارو کې مداخله و نه کړي.
دغه راز نوموړي د ریاست کارکوونکو ته لارښوونه وکړه چې خپل حاضرۍ ته پابنده اوسي او په ټاکل شوي وخت خپلو دندو ته حاضر اوسي او د اړتیا پر مهال له ادارې څخه رسمي رخصتي ترلاسه کړي.
دغه راز د عدليې رئیس د یاد ریاست کارکوونکو ته سپارښتنه وکړه چې د خپل چارو ترسره کولو کې مادیات نه بلکې د لوی څښتن تعالی رضا په پام کې ولري او له حسد، کینې او قومي او ژبني تعصبونو څخه ډډه وکړي.
دغه راز نوموړي هغوی ته توصیه وکړه چې خپل صورت او سیرت له اسلامي شریعت سره سم عیار کړي.
