د ځمکو د غصب د مخنیوي د کمېسیون ناسته جوړه شوه
د ځمکو د غصب د مخنیوي او د غصب شویو ځمکو د استرداد کمېسیون ناسته د ۱۴۴۴ هجري قمري کال د شعبان میاشت په ۲۱ نېټه د دوشنبې په ورځ د عدليې وزارت د سرپرست شیخ الحدیث مولوي عبدالحکیم شرعي په مشرۍ او د کور او ښار جوړولو وزارت، لوی څارنوالۍ د سرپرستانو او د چارو د ادارې د لوی رئیس، د کرنې او اوبولګولو وزارت معین، د ځانګړې محکمې د رئیس او اړوندو غړو او د امارت د قضایاو د لوی رئیس په ګډون، د ننګرهار ولایت د ښاروالۍ په میلمستون کې جوړه شوه.
یاده ناسته کې، د کمېسیون غړو ددغه کمېسیون د تېرو څو ورځو د کړنو او تصمیمونو په اړه بحث او نظرونه یې سره تبادله کړل او د یو شمېر ښارګوټو او نورو ساحو دوسیې هم بررسي کړې. دغه راز یاد کمېسیون ټاکل شویو ساحو ته د تخنیکي هیئت د استولو، لارښوونه وکړه.
یاد کمېسیون، ددغې ورځې په اږدو کې د سیاف د فامیلیو، د دولتزیو ښارګوټي، د هسکې مینې ولسوالۍ او د شیرزاد ولسوالۍ له اوسیدونکو او د کانال له یو شمېر غیرشرعي متصرفینو سره وکتل، د هغوی غوښتنې او وړاندیزونه یې واوریدل او له هغوی څخه یې د غصب شویو ځمکو په اړه، سندونه وغوښتل.
د یادولو وړ ده چې یاد کمېسیون د اسلامي امارت د کابینې د پریکړې پر اساس د غصب شویو ځمکو د استرداد په منظور، ننګرهار ولایت ته رسمي سفر وکړ او تر دې دمه یې د غصب شویو ځمکو د استرداد په برخه کې چټک او کوټلي ګامونه پورته کړي او ددغه کمېسیون کړنې اوس هم ددغه ولایت په بېلابیلو ساحو کې روان دي.
