د جوزجان ولایت د تخنیکي هیئت ناسته جوړه شوه
د جوزجان ولایت د ځمکو د غصب د مخنیوي د تخنیکي هیئت ناسته د شعبان میاشت په ۱۹ نېټه د یکشنبې په ورځ ددغه هیئت د رئیس او غړو په حضور سره جوړه شوه.
دغې ناسته کې په مرنجان، سه شنبه (د ترکستان ښارګوټی)، منګوتي، د افغان ګاز تصدۍ او د جوزجان ولایت د خواجه دوکو، قوشتپه او مرکز ترمنځ د عامه مرعی ځمکې د ساحې په اړه د موظف شوي ټیم راپور وړاندې شو او موظف ټیم ته دنده وسپارل شوه چې د یاد شویو ساحو ټول اصولي سندونه او څېړنې بشپړې کړي او د راپور په ترڅ کې تخنیکي هیئت ناسته کې یې وړاندې کړي.
دغه راز یاد شوي تخنیکي هیئت د ولایت د مرکز او ولسوالیو په کچه د ادارو د غصب شویو ځمکو استول شوي جدولونو په اړه د تخنیکي هیئت د سکرتریت راپور واورید او تصمیم ونیو چې له یادو شویو ادارو څخه استول شوي جدولونه د ډاډمنتیا او اجراآتو په غرض مرکزي کمېسیون ته واستول شي.
دغه راز تخنیکي هیئت د امارت د قضایاو راپور له محکمو څخه د استول شویو دوسیو په اړه بررسي کړ. ددغه راپور په اساس د جوزجان ولایت د مرکز په پمخانه (قره قینت) کلي کې ۱۶۴ جریبه ځمکه او د کرنې د ادارې ۵۱۸ جریبه ځمکه د خلکو لخوا غصب شوې ده. یاد شوي هیئت مسلکي او فني ټیم توظیف کړ چې د یادو ساحو څېړنې او اصولي سندونه بشپړ کړي او د راپور په ترڅ کې یې دغه تخنیکي هیئت ته وړاندې کړي.
