د لغمان ولایت د تخنیکي هیئت ناسته جوړه شوه
د لغمان ولایت د ځمکو د غصب د مخنیوي تخنیکي هیئت ناسته د شعبان میاشت په ۱۹ نېټه د شنبې په ورځ ددغه هیئت د رئیس او غړو په حضور سره جوړه شوه.
دغې ناسته کې، تخنیکي هیئت د احصایي او معلوماتو ریاست ودانۍ د ځمکې د تثبیت او تشخیص په موخه، ددغه ریاست له رئیس او ددغې ځمکې له دوه تنو دعوا درلودونکو سره وکتل او د دواړو لورو څرګندونې یې واوریدلې او له هغوی څخه یې قانوني سندونه وغوښتل.
پر دې سربېره، دغه تخنیکي هیئت د قرغیو ولسوالۍ د سرخکانو د سیمې د ۸۶ جریبه امارتي تثبیت شوې ځمکې له څو تنو دعوا درلودونکو سره وکتل او هغوی ته یې لازمې لارښوونې وکړې.
په دوام کې، تخنیکي هیئت د سلطان غازي بابا ښارگوټي د بلند منزلو د ځمکې له متصرفینو او د دغې ځمکې له مالکانو سره وکتل. ددغې ناستې په پایله کې، متصرفو اشخاصو دا ومنله چې دغه ځمکه د ښاروالۍ ریاست له خوا د بلند منزلو جوړولو له پاره ویشل شوې او ددغې ځمکې د مالکانو حق دي. دغې برخه کې له متصرفو اشخاصو څخه اقرار لیک واخیستل شو چې دوی به دا ساحه تخلیه کوي او ځمکه به یې مالکانو ته سپاري.
