کندهار ولایت کې نږدې ۷۸ جریبه ځمکه له غصب څخه آزاده شوه
د کندهار او پکتیکا ولایتونو د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او په یادو ولایتونو کې د ځمکې د غصب د مخنیوي برخه کې یو لړ اقدامات هم ترسره شوو.
د کندهار ولایت د تخنیکي هیئت په ناسته کې د عینو مینې د سوداګرو، له کمېسیون څخه د اجارې ورکوونې د ترلاسه شوې کړنلارې د موضوعاتو او د یو شخص د موضوع د بررسۍ په اړه بحث او د نظر تبادله وشوه.
دغه هیئت د صنعتي پارک د ۱۰۰۰ جریبه ځمکې په بررسۍ سره، ۷۸ جریبه غصب شوې ځمکه له غصب څخه آزاده کړه.
یاد شوي هیئت د یو شخص د لیک، د عینو مینې د موضوعاتو او د راتلونکي اوونۍ کاري پلان په اړه بحث وکړ او دغې برخه کې لازم تصمیمونه ونیول.
په همدې حال کې، د پکتیکا ولایت د تخنیکي هیئت په ناسته کې کاري پلان جوړ شو او یاد هیئت د دیلي ولسوالۍ له قومي مشرانو سره هم وکتل او هغوی ته یې ددغه هیئت د فعالیتونو په اړه معلومات وړاندې کړل.
یادو خلکو هم د خپلې ولسوالۍ د امارتي ځمکو په اړه معلومات وړاندې کړل او ژمنه يې وکړه چې د اسلامي امارت اصولو ته پابند اوسي.
