خوست ولایت کې له ۷۰ جریبو څخه زیاته ځمکه امارتي تثبیت شوه
د خوست او غور ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او دغو ولایتونو کې د غصب د مخنیوي په برخه کې لازم اقدامات ترسره شول.
د خوست ولایت تخنیکي هیئت د خپل ناستې په جوړولو سره ددغه ولایت د مرکز پنزايي ساحې ته ولاړ او ۷۰.۳۸ جریبه ځمکه يې چې ۹ کادستري قطعې کې ثبت ده، امارتي تثبیت کړه.
دغه هیئت د یادې ځمکې غاصبینو ته استعلام ورکړ ترڅو خپل سندونه حاضر کړي، دغه راز یاد هیئت د ګربزو ولسوالۍ کړم ساحې ته ولاړ او د سکرو ډبرو له پاره ټاکل شوې ځمکې څخه يې لیدنه وکړه، ددغه هیئت یو بل ګروپ ددغه ولایت په کرنې ریاست کې، د خلکو لخوا وړاندې شوي سندونه بررسي کړل.
په همدې حال کې، د غور ولایت د تخنیکي هیئت په ناسته کې د کابل ـ غور دروازې د ساحې د ځمکې په اړه چې پشته وردک ها باندې شهرت لري بحث وشو او پریکړه وشوه چې هیئت ساحه له نږدې وګوري او د هغې د متصرفینو سندونه په دقیق ډول بررسي کړي.
په دغې ناسته کې د غور په مرکز کې د وقفي ځمکې په اړه د یو شخص سندونه هم بررسي شوو او پریکړه وشوه چې یاده ځمکه له نږدې ولیدل شي او سندونو ته له ساحې سره مطابقت ورکړل شي. دغه راز د حاجي صحت او حاجي الله داد د هستوګنې کورونو د ځمکې په تړاو پریکړه وشوه چې یاد اشخاص د خپل د ملکیت تثبیت شاهدان او سندونه هیئت ته وړاندې کړي.
د هوايي ډګر د NDB ساحې د ځمکې په اړه پریکړه وشوه چې هیئت د کرنې، ښاروالۍ او کور جوړولو انجنیرانو په شمول ساحه له نږدې وګوري او د هوايي ډګر د آمریت سندونه له ساحې سره تطبیق کړي.
دغه راز یاد هیئت ددغه ولایت د ښاروالۍ ریاست ته د یو شمېر اشخاصو په اړه چې پر شنې ساحې يې کورونه جوړ کړي، استعلام ورکړ.
