د بلخ ولایت په ناصر خسرو پروژې کې څه دپاسه ۹۹۰۰ جریبه ځمکه امارتي تثبیت شوه
د بلخ ولایت د ځمکې د غصب د مخنیوي د تخنیکي هیئت ناسته ددغه هیئت د رییس او غړو په حضور سره جوړه شوه او د زینبیې پروژې عریضه او سندونه چې د کمېسیون لخوا تخنیکي هیئت ته راجع شوي وو، پکښې بررسي شول.
د زینبيې، بلخ باستان، هاشمي، سید یحیی او مسلمین پروژو مسوولین هم دغې غونډې ته حاضر او استعلام ورکړل شو تر څو ځواب ورکړي.
دغې ناسته کې پریکړه وشوه چې د هغو پروژو چې سندونه یې د تخنیکي هیئت بررسۍ لاندې دي د ودانولو، پیرلو او پلورولو د مخنیوي په منظور امنیه قوماندانۍ ته تعقیبي لیک صادر شي.
یاد شوي هیئت د هاشمي، د حاجي غني ۲۰ جریبه او ناصر خسرو بلخي پروژو د بررسۍ په منظور، یادو ساحو ته ولاړ. د ناصر خسرو بلخي پروژه کې ۱۰۸۴۰ جریبه ځمکه شامله ده چې ۹۰۰ جریبه یې د ۲۰۲ ګڼې قبالې څخه اجرا شوي دي.
یاد شوي هیئت د یادې شوې ځمکې اندازه د کمېسیون تر لارښوونې پورې د ټولې ځمکې څخه جلا کړې او پاتې ۹۹۴۰ جریبه ځمکه ساحه کې د قبالو د عدم تطبیق په دلیل، د فاقد صلاحیت والي لخوا د قبالو اجرا او د پروژې د مسوول یا د هغه د قانوني استازي د نه شتون له امله، امارتي تثبیت او د کرنې ریاست ته استرداد کړه.
