د پروان او کنړ ولایتونو د تخنیکي هیئتونو ناستې جوړې شوې
د پروان او کنړ ولایتونو د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او یادو ولایتونو کې له ځینو غصب شوو ساحو څخه هم لیدنه وشوه.
د پروان ولایت د تخنیکي هیئت ناسته کې د کارونو د لاښه پرمخ وړلو او د بګرام ولسوالۍ د خم کلان سیمې موضوع په اړه بحث او د نظر تبادله وشوه.
په همدې توګه دغې ناسته کې بګرام ولسوالۍ د خم کلان ساحې د مساحت او د بیې ټاکلو په اړه بحث وشو.
په همدې حال کې، د کنړ ولایت د تخنیکي هیئت د غصب شوو ځمکو د بررسۍ او تثبیت په منظور ددغه ولایت سرکاڼو ولسوالۍ ته سفر وکړ.
یاد هیئت، د سرکاڼو ولسوالۍ دونهي ډاګ کې لاس نه خوړل شوې او شاړه ځمکه بررسي کړه، مساحت او اندازه یې مشخصه کړه.
یو شمېر حقیقي اشخاص په یاده ځمکه د مالکیت ادعا لري چې له هغوی څخه سندونه وغوښتل شول او سیمه ییزو مسوولینو ته د امارتي املاکو د ساتنې په اړه لارښوونه وشوه.
دغه راز هیئت ددفاع وزارت او د حقیقي اشخاصو تر شخړې لاندې ساحې څخه لیدنه وکړه او د هیئت سکرتریت دنده وسپارله ترڅو اړوند معلومات راټول کړي ترڅو له هغو سره سم شخصي او امارتي ملکیتونه تفکیک شي.
