د کندهار، لغمان او پکتیکا ولایتونو د تخنیکي هیئتونو ناستې جوړې شوې
د کندهار، لغمان او پکتیکا ولایتونو د تخنیکي هیئتونو ناستې ددغو هیئتونو د رییسانو او غړو به حضور سره جوړې شوې او یادو ولایتونو کې له ځینو غصب شوو سیمو څخه هم لیدنه وشوه.
د کندهار ولایت د تخنیکي هیئت په ناسته کې د هغو غصب شوو ځمکو په اړه چې بڼونه او نور تاسیسات پکې جوړ شوي دي د کرنې د وزارت د لارښوونې د عملي کولو په اړه بحث او د نظر تبادله وشوه.
دغه راز په یاده ناسته کې، د صنعتي پارک او د موضوع د بررسۍ له پاره د یو ګروپ تعیین او راتلونکې غونډې ته موضوع د اړوندو کوچیانو د استازو غوښتل او په محکمو کې تر دوران لاندې د دوسیو په اړه، بحث وشو.
په همدې حال کې، د لغمان ولایت د تخنیکي هیئت ناسته کې، د علینګار ولسوالۍ پروايي سیمه کې د ۴۷۷.۵۳ جریبه ځمکې په اړه بحث او د نظر تبادله وشوه.
دغه هیئت د یادې سیمې له خلکو سره هم وکتل او د عارضینو نظریات يې واوریدل او له هغوی څخه یې قانوني سندونه وغوښتل. یادو اوسیدونکو سندونه نه درولودل او ادعای درلودله چې دغه ځمکه د هغوی څړځای دی. یاد شوي هیئت له محکمې څخه د خاصه مرعی په اړه فتوا وغوښتله.
پر دې سربېره، د پکتیکا ولایت د تخنیکي هیئت په ناسته کې، د راتلونکي ورځ پلان جوړ شو او هم د ځینو مهمو موضوعاتو په اړه لازم تصمیمونه ونیول شول.
