نیمروز ولایت کي له ۳۰۰ زره جریبو څخه زیاته ځمکه امارتي تثبیت شوه
د نیمروز ولایت د تخنیکي هیئت ناسته د یاد هیئت د رییس او غړو په حضور سره جوړه شوه او د غصب شوو ځمکو د استرداد او د امارتي ځمکو د غصب د مخنیوي په اړه بحث وشو.
یاد هیئت دلارام ولسوالۍ ته ولاړ او د بررسۍ پایله کې ۱۱۳ زره او ۵۰۰ جریبه غصب شوې ځکمه په ګوته کړه.
دغه راز یاد هیئت ۱۹۹ زره او ۸۶۸ جریبه ځمکه چې د اشخاصو لخوا خط اچول شوې وه، تفکیک او ددغې ولسوالۍ د کرنې ریاست ته تحویل شوه ترڅو له هغې څخه ساتنه وشي.
په همدې حال کې، د کندهار ولایت تخنیکي هیئت ژړۍ ولسوالۍ ته ولاړ او دغې ولسوالۍ کې امارتي غصب شوې ځمکې تثبیت کړې.
یاد هیئت د ژړۍ ولسوالۍ له ولسوال او قاضي سره وکتل او د ځمکې د غصب د مخنیوي په اړه يې له هغوی سره خبرې وکړې.
هیئت ددغې ولسوالۍ په شمال کې ۱۷ زره او ۵۷۳.۷۳ جریبه ځمکه امارتي تثبیت کړه. یاده شوې ځمکه د کوچیو لخوا غصب شوي او ودانۍ او کروندې پرې جوړې شوي دي.
یاد هیئت دغې سیمه کې تصرفات منع کړل او هم یې دغې سیمه کې برمه کاري ودرولې. هیئت متصرفینو ته وویل چې هغوی کولای شي د اسلامي امارت د اصولو په پام کې نیولو سره یادې ځمکې په اجاره واخلي.
