بغلان ولایت کې د ۸ زره او ۳۳۷ جریبه غصب شوې ځمکې د بررسۍ کار پیل شوه
د بغلان ولایت د ځمکې د غصب د مخنیوي تخنیکي هیئت ددغه ولایت له والي سره وکتل او د خپل د فعالیتونو راپور یې هغوی سره شریک کړ. د بغلان ولایت والي ددغه هیئت د کړنو هرکلی وکړ او خپل ملاتړ یې له هغوی اعلام کړ.
یاد هیئت د کوه تاوه لمنې د نهر ګوهرګان له پاسه د کرنې ریاست اړوند د فارم لرخوابي ۸ زره او ۳۳۷ جریبه او د هژده کوتل غصب شوې ځمکې د استرداد په اړه، ددغه ولایت والي ته معلومات ورکړل او له سیمې څخه یې له نږدې لیدنه وکړه. یاده سیمه د درېو قومونو وردک، لرخوابي او احمدزیو لخوا تر کښت لاندې نیول شوې ده.
ددغه هیئت د کادستر ټیم ۱ زرو ۵۰ جریبه کرنیزه ځمکه د نهر خشک لاندې او ددغه نهر له پاسه ۲ زرو ۱۰۰ جریبه للمي ځمکه بررسي او مساحت کړه او ددغو ځمکو په اړه یې د احمدزیو قوم له خلکو څخه سندونه وغوښتل.
په همدې حال کې، د لغمان ولایت د تخنیکي هیئت ناسته هم ددغه هیئت د رییس او غړو په حضور سره جوړه شوه او وروسته یاد هیئت په دغه ولایت کې له ځینو سیمو څخه لیدنه وکړه.
دغه راز یاد هیئت د کرنج سیمې له عارضینو سره چې د هغوی د هدیرې وقفي ځمکه د غاصبانو لخوا غصب شوې ده وکتل او موضوع د لا زیاتې بررسۍ له پاره د ارشاد، حج او اوقافو ریاست ته راجع کړه.
پر دې سربېره، د جوزجان ولایت د ځمکې د غصب د مخنیوي کمېسیون تخنیکي هیئت په تېرو دوو ورځو کې ددغه ولایت له لویدیځ څړځایونو څخه چې په چیم شکنۍ، کښت او کرنې سره د ځینو اشخاصو تر تصرف لاندې نیول شوې، لیدنه وکړه. دغه ځمکې په یاده سیمه کې د قومونو ترمنځ د شخړې سبب هم شوې ده.
یاد هیئت دغې سیمې ته په تګ سره د قومونو ترمنځ له شخړې مخنیوي کړی او د امیرالمومنین حفظه الله فرمان یې هغوی ته اعلام کړ. دغه راز هیئت ټینګار وکړ چې هيڅوک حق نه لري چې څړځایونه تر خپل تصرف لاندې راولي.
