د عدليې وزارت د مرکزي رییسانو اداري ناسته جوړه شوه
د اسلامي امارت د عدليې وزارت د مرکزي رییسانو اداري ناسته د جمادي الاول میاشت په ۱۷ نېټه د یکشنبې په ورځ د مسلکي معین شیخ عبدالکریم حیدر په مشرۍ او ددغه وزارت د مرکزي رییسانو او مسوولینو په ګډون ددغه وزارت په مقر کې جوړه شوه.
په دغې ناسته کې، د سیمینارونو او د ښوونیزو برنامو د جوړولو، د موټر پلورونکو او د معاملو د لارښوونو له پاره د کړنلارې او لایحې جوړولو، د شمال ولایتونو د استول شوي پلاو د راپور وړاندې کولو، د عدلیې وزارت د کارکوونکو د هویت کارت د ویش کړنلارې، د مدافع وکیلانو د داخلې د آزموینې لایحې او د تقنیني ستاژ د کړنلارې په اړه بحث او د نظرونو تبادله ترسره شوه.
په یاده ناسته کې، د سیمینارونو او ښوونیزو برنامو په اړه چې دعدليې وزارت د ریاستونو لخوا ترسره کیږي بحث وشو او پریکړه وشوه چې ددغه راز برنامو له ترسره کولو څخه وړاندې، د بشري سرچینو ریاست او د اصول جوړونې ریاست باید ددغو برنامو نصاب د وزارت له مقام سره شریک کړي او د وزارت د مقام له منظورۍ څخه وروسته، یادې شوې برنامې ترسره شي.
په دغې ناسته کې د موټر پلورونکو او د معاملو د لارښوونو په اړه هم بحث وشو او تصمیم ونیول شو چې د موټر پلورونکو او د معاملو د لارښوونو له پاره هم یو کړنلاره او لایحه جوړه شي. په دغې ناسته کې مولوي رحمت الله حقاني شمال ولایتونو ته د استول شوي پلاوي راپور هم وړاندې کړ او پریکړه وشوه چې په راتلونکي ناسته کې پرې بحث وشي.
دغه راز په یاده ناسته کې د عدليې وزارت د کارکوونکو د هویت د کارتونو د ویش کړنلارې په اړه بحث او نظرونه تبادله شول او پریکړه وشوه چې یاد شوې کړنلاره د تدقیق او ژباړې په منظور د اصول جوړونې ریاست ته واستول شي.
د مدافع وکیلانو د داخلې آزموینې لایحه او د تقنیني ستاژ کړنلاره په دغې ناسته کې د بحث اړوند نورو موضوعاتو څخه وو چې یوه کمېټه د مدافع وکیلانو د رییس په ریاست او د اصول جوړونې ریاست، د حقوقي مرستو ریاست، د بشري سرچینو ریاست او د قوانینو د طرحې ریاست د استازو په غړیتوب موظفه شوه چې دغه طرحه په دقیق ډول مطالعه کړي او خپل نظرونه په راتلونکې ناسته کې وړاندې کړي.
