د کندهار ولایت په عینو میني ښارګوټي کې د افکو کمپنې شل زره جریبه ځمکه تثبیت او تصفیه شوه
د کندهار ولایت د ځمکې د غصب د مخنیوي د تخنیکي هیئت ناسته د هیئت د رییس او غړو، د عینو میني د ښارګوټي د نظارت د کمېټې غړو او ددغه ښارګوټي د مسوولینو په حضور سره جوړه شوه او په هغې کې د عینو میني د ښارګوټي موضوع او یو شمېر نور موضوعات بررسي شول.
په دغې ناسته کې، د عینو میني ښارګوټي مسوولینو ددغه ښارګوټي د کارونو په اړه مفصل معلومات وړاندې کړل او د کاري چارو پر چټکتیا هم ټینګار وشو.
په یاده ناسته کې، د تصفیې هیئت د خپلو فعالیتونو راپور وړاندې کړ او ويې ویل چې د افکو کمپنۍ پر ۲۰ زره جریبه ځمکې د تثبیت او تصفیې عملیه ترسره شوې او یاده ځمکه مشخصه او نښاني شوې ده.
په دغې ناسته کې ۱۳ زره او ۲۴۰ جریبه نوره ځمکه چې د عینو میني د تصفيې پلان کې شامله وه، مشخصه شوه. یاد شوي هیئت د کړنلارې پر بنسټ له ټولو حقیقي او حکمي اشخاصو څخه چې پر یادې شوې سیمې د ملکیت ادعا لري، معتبر سندونه وغوښتل او له بېلابېلو ادارو څخه هم په دې اړه معلومات وغوښتل شول.
د کندهار ولایت تخنیکي هیئت هم ۷۹۶.۶ جریبه کرنیزه ځمکه ددغه ولایت د ډنډ ولسوالۍ په ده باغ کیلي کې دولتي تثبیت کړې ده.
د تېرو دوو ورځو په ترڅ کې د جوزجان، ارزګان او کنړ ولایتونو د ځمکې د غصب د مخنیوي تخنیکي هیئتونو خپل ناستې جوړې او په دغو ولایتونو کې یې له غصب شوو سیمو څخه لیدنه او بررسي ترسره کړه.
د جوزجان ولایت تخنیکي هیئت ددغه ولایت له والي سره وکتل او د یاد شوي هیئت د کاري چارو په اړه یې خبرې وکړې. دغه راز هیئت د خپل د غونډو راپور ددغه ولایت له والي سره شریک کړ.
د ارزګان ولایت د تخنیکي هیئت په ناسته کې د چوره ولسوالۍ کاش سیمه کې د غصب شوو ځمکو په اړه چې د خلکو لخوا غصب شوې بحث وشو. دغه ځمکه چې نږدې ۲۰۰۰ جریبه مساحت لري امارتي تثبیت شوه او بېرته اسلامي امارت ته وسپارل شوه.
دغه راز د کنړ ولایت د تخنیکي هیئت په ناسته کې د کادستر ټیم د ۴ کیلیو د ځمکو په اړه معلومات وړاندې کړل. په دغې ناسته کې د هیئت منشي، د لچګلي او ډنډ ځمکو په اړه کادستري ټول شوي معلومات غونډې ته وړاندې کړل.
دغه راز هیئت ۳۰۴ جریبه ځمکې باندې چې اوس هم د غصب په حالت کې ده عملي کار پیل کړ او کادستري نقشې یې تطبیق کړې.
