د غرب زون د ولایتونو د عدلیې ریاستونو د امرینو او کارکوونکو د څلور ورځني سیمینار پای
د غرب زون د ولایتونو د عدلیې ریاستونو د امرینو او کارکوونکو څلور ورځنی سیمینار د ربیع الثاني میاشت په ۲۱ نېټه د چهارشنبې په ورځ ددغه سیمنار د ګډون کوونکو له پاره د تصدیق پاڼو په ویش سره پای ته ورسید.
ددغه سیمینار د پای مراسمو کې چې د هرات ولایت په عدلیې ریاست کې جوړ شوي وو، د هرات ولایت والي موالانا نور احمد اسلام جار، د عدلیې رییس مولوي یار محمد جانان خادمي، د عدلیې وزارت د بشري سرچینو د ظرفیت لوړولو امر مفتي احمد ضیاء خبیب او ددغه سیمینار ګډونوالو حضور درلود.
په دغو مراسمو کې د هرات ولایت والي د موضوع په اړه خبرې وکړې او د عدلیې ریاست له کړنو څخه یې ستاینه او قدرداني وکړه. دغه راز نوموړي د عدلیې ریاست همکاران وهڅول چې لا زیاته هڅه وکړي چې په عدلي او قضایي ارګانونو کې کارونو له دې هم ښه شي. نوموړي په هرات ولایت کې ددغه سیمینار د جوړو له پاره له عدليې وزارت څخه هم مننه او قدرداني وکړه.
په یاد محفل کې د عدليې رییس هم ددغه سیمینار له جوړونکو څخه مننه وکړه او په راتلونکو کې یې هم د دغه ډول برنامو د جوړیدو غوښتنه وکړه. هغه هيله څرګنده کړه، چې دغه سیمینار به د چارو د ښه والي برخه کې اغیزمن تمام شوی وي.
دغه سیمینار د هرات ولایت والي او د عدلیې رییس له لوري د تصدیق پاڼو په ویش سره پای ته ورسید. په دغه سیمینار کې چې د عدليې وزارت د بشري سرچینو د ریاست له لوري جوړ شوی وو، د بادغیس، غور، فراه، نیمروز او هرات ولایتونو د عدلیې ریاستونو ۲۶ تنو امرینو او کارکوونکو ګډون کړی وو او په اداري او مسلکي برخو کې موضوعات زده کړل.
