د پکتیا ولایت د عدليې ریاست اونیزه ناسته جوړه شوه
د پکتیا ولایت د عدليې ریاست اونیزه ناسته د ربیع الثاني میاشت په ۸ نېټه د پنجشنبې په ورځ د عدليې رییس مولوي محمد رییس محمدي په مشرۍ او د دغه ریاست د امرینو او کارکوونکو په ګډون د عدليې ریاست په مقر کې جوړه شوه.
په دغې ناسته کې د عدلیې رییس د دغه ریاست د تېرې اونۍ لاسته راوړنو، ستونزو او د راتلونکې اونۍ د کاري پلان په اړه مفصلې خبرې وکړې. دغه راز هغه د یاد ریاست د کارکوونکو ستونزې او وړاندیزونه واوریدل او هغوی ته يې ډاډ ورکړ چې د هغوی د وړاندیزونو د پوره کولو او د ستونزو د حل په برخه کې به له هیڅ ډول هڅې او هاند څخه ډډه و نه کړي.
په دغې ناسته کې د عدليې رییس د دغه ریاست کارکوونکو له پاره توصیه وکړه چې د خپل امرینو له امرونو څخه اطاعت وکړي او خپل صورت او سیرت له نبوي سنت سره سم عیار کړي. هغه د امربالمعروف له حکمونو څخه د اطاعت او په جماعت سره د لمانځه په ادا کولو ټینګار وکړ.
دغه راز د عدليې رییس د یاد ریاست له کارکوونکو څخه وغوښتل چې رسمي وختونو ته پابنده اوسي او له غیر ضروري غیرحاضریو څخه ډډه وکړي. دغه راز نوموړي له هغوی څخه وغوښتل چې خپل حاضري په ټاکل شوو وختونو کې لاسلیک کړي او خپل مسوولیتونه په پوره صداقت او اخلاص سره په خپل وخت کې اجرا کړي.
