د پکتیکا ولایت د عدليې رییس د دغه ولایت د موټرپلورنځیو له مسوولینو سره وکتل
د پکتیکا ولایت د عدليې رییس مولوي حیات الله آمین د ربیع اولاول میاشتې په ۱۰ نېټه د پنجشنبې په ورځ د دغه ولایت د ښرنۍ ښار او د ارګون او زرغون شهر ولسوالیو د موټرپلورنځیو له یو شمېر مسوولینو سره وکتل.
په دغې لیدنه کې، د عدليې رییس د موټرپلورنځیو خاوندانو ته توصیه وکړه چې خپلې معاملې د اسلامي امارت له پالیسېو سره سم سرته ورسوي او په خپلو معاملو کې له افغانۍ پیسو څخه کار واخلي ځکه چې دغه کار سره هم د امیر المومنین حفظه الله امر پلي کیږي او هم په بازار کې د افغانۍ پیسو ارزښت ساتل کېږي.
هغه ټینګار وکړ چې افغانۍ پیسې زموږ ملي هویت دی او ترویج یې د هر افغان ملي او دیني وجیبه ده.
د موټرپلورنځیو مسوولینو د دغه ولایت د مقام د لیکل شوو لارښوونو هرکلی وکړ او د اسلامي امارت ټولو اصولو ته يې د وفادارۍ او د رعایتولو ژمنه وکړه.
د موټرپلورنځیو مسوولینو خپلې ستونزې د عدليې له رییس سره شریکې کړې او له هغه يې وغوښتل چې د دغو ستونز په حل کې له هغوی سره همکاري وکړي.
د عدليې رییس له هغوی سره ژمنه وکړه، چې د هغوی ستونزې له اړونده مسوولینو او مقاماتو سره شریکوي او هغو ته به د حل لار وموندي.
