د ادارې او مدیریت د روزنیزې برنامې فارغانو له پاره د تصدیق نامو ویش
د اسلامي امارت د عدليې وزارت د بشري سرچینو ریاست د صفرالمظفر میاشتې په ۲۵ نېټه د چهارشنبې په ورځ د ادارې او مدیریت د روزنيزې برنامې فارغانو له پاره تصدیق نامې وویشلې.
په دې مناسبت په عدلیې وزارت کې یو محفل جوړ شوی وو، چې د قانون جوړونې د انستېتوت لوی رییس مفتي فضل هادي صاحب زاده، د دغه ریاست مرستیال، د انسجام لوی رییس، د دعوت او ارشاد رییس، د روزنیزې برنامې ښوونکو او فارغانو او د عدليې وزارت یو شمېر کارکوونکو ګډون کړی وو.
د قانون جوړونې د چارو د انستېتوت لوی رییس د یادې برنامې له جوړونکو څخه مننه او هرکلی وکړ او د دغې برنامې فارغانو ته یې د بریالیتوب هیله وکړه. هغه د دغې برنامې فارغانو ته د مبارکۍ ترڅنګ، له هغوی څخه وغوښتل چې خپلې زدکړې د خپلو ادارو د چارو لا ښه والي له پاره وکاروئ.
دغه ښوونیزه برنامه د عدليې وزارت د بشري سرچینو د ریاست لخوا جوړه شوې وه او د دغه ریاست د ښوونې او د ظرفیت د لوړوالي برخې د ښوونکو لخوا تدریس شوه. په دغې روزنیزې برنامه کې د عدليې وزارت ۲۸ تنو مرکزي کارکوونکو ګډون کړی وو.
په دې برنامه کې د عدليې وزارت معرفي، تشکیلاتي جوړښت او موخې یې، د صلاحیت تفویض، د ادارې او مدیریت اساسات، د اداري مراسلاتو لارښوود، پلان جوړونه او د ادارې د انسجا په چارو کې یې ارزښت، اداري اخلاق، تصمیم نیونه، اداري اجراآت او نور موضوعات تدریس شوي دي.
