د ټولنو او ټولنیزو بنسټونو رياست فعاليت پيل کړی
د ټولونو او ټولینزو بنسټونو ریاست چې د اسلامي امارت تر راتګ وروسته یې بیا ځلې خپل کارونه پېل کړي، مسؤلين يې په خپل کاري ډګر کې د خدماتو په وړاندې کولو بوخت دي.
ځينو اړينو بدلونونو ته چې اړتيا وه هغه يې هم ترسره کړي چې يو له هغو څخه د ټولنو د جواز په برخه کې دی، پخوا جوازليکونه يواځې په دري ژبه جوړ شوي وو، اوس پښتو ژبه هم پکې زياته شوې بيا د تقنين سره شريک شوي او د هغوی له لوري هم تاييد شوي دي.
ياد رياست په خپل کاري کړنو کې د څلورو خيريه بنسټونو د دفترونو څخه ليدنه هم کړې ده او همداراز يې اووه خيريه بنسټونو او اتحاديو ته د جواز کار چمتو کړی او د تاييد لپاره يې د وزارت مقام ته وړاندې کړی چې له تاييد وروسته به ورته وسپارل شي ترڅو خيريه بنسټونه او اتحاديې په عادي ډول خپل فعاليت ته دوام ورکړي.
