په نيمروز ولایت کې له یو شمېر دارالوکالو څخه نظارت ترسره شو
د نيمروز ولایت د عدليې ریاست نظارتي پلاوي، د ربیع الآخر د مياشتې په ۲۲ مه نېټه د چهارشنبې په ورځ، د دغه ولایت مرکز زرنج ښار کې د دارالوکالو له یو شمېر دفترونو څخه نظارت ترسره کړ.
مؤظف نظارتي پلاوي د یادو دارالوکالو دفترونه، د فعالیت جوازونه، لوحې او یو شمېر نور اړين اسناد بررسي کړل.
د نظارت پر مهال د یادو دفترونو په فعاليتونو کې یو شمېر نيمګړتياوې او ستونزې مشخصې شوې چې د یادو ستونزو د لرې کولو او همدارنګه د کاري چارو ښه پرمخ وړلو په موخه لازمې توصیې وشوې.
د عدلیې وزارت په مرکز او د عدلیې ریاستونه په ولایتونو کې په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
