د ارزګان په مرکز کې د امارتي ځمکو له غصب څخه مخنیوی وشو
د ارزګان ولایت د ځمکو له غصب څخه د مخنیوي تخنیکي هیئت د صفرالمظفر د مياشتې په ۱۰ مه نېټه د دوشنبې په ورځ، د غصب شویو ځمکو د بررسۍ په موخه د یاد ولایت د مرکز، ترينکوټ ځینو ساحه ته ولاړ او یادي ځمکې یې له نږدې ولیدې.
تخنيکي هيئت د دغې لیدنې په ترڅ کې د ترينکوټ اړوند په مهر اباد ساحه کې پر يو زرو پنځه سوه پنځه پنځوس (۱۵۵۵) جریبه امارتي ځمکه د یو شمېر نويو تصرفاتو مخه ونيوله او د یادې ځمکې پر متصرفينو یې ټینګار وکړ چې له نويو تصرفاتو څخه ډډه وکړي.
همدارنګه تخنيکي هيئت پرېکړه وکړه چې د يادې ځمکې په اړه دې املاکي څېړنې ترسره شي او دوسیه یې د وروستني پرېکړې په موخه مرکزي کمېسيون ته واستول شي.
