د عدليې وزير د خصوصي روغتونونو له یو شمېر مسئولینو سره ناسته وکړه
د اسلامي امارت د عدليې وزير، محترم شيخ الحديث مولوي عبدالحکيم شرعي د يوې ناستې په ترڅ کې د يو شمېر خصوصي روغتونونو له مسئولينو سره وکتل او د بېلابېلو موضوعاتو په اړه يې له هغوی سره خبرې وکړې.
په دې ناسته کې چې د شوال په ۲۲مه نېټه د یکشنبې په ورځ د عدليې وزارت په مقر کې جوړه شوه، د عامې روغتيا وزارت مالي او اداري معين، محترم ملا بخت الرحمن شرافت، د استخباراتو استازي، د عدليې وزارت د انسجام عمومي رئيس، محترم مفتي احمدضيا خبيب او د دغه وزارت د بېلابېلو برخو نور مسئولین هم ګډون درلود.
د عدليې وزير په دې ناسته کې د خپلو خبرو په ترڅ کې وویل چې د خصوصي روغتونونو هغه ټولنه چې د اسلامي امارت له واکمنۍ څخه وړاندې یې فعالیت درلود، لغوه شوې ده او د خصوصي روغتونونو مسئولین دې د نوې اتحادیې جوړولو لپاره اقدام وکړي تر څو له دې لارې د خلکو او روغتونونو ستونزو ته رسیدګي وشي.
نوموړي ټینګار وکړ، چې خلک د روغتیا په برخه کې له ګڼو ستونزو سره مخ دي له دې جملې د روغتونونو، درملتونونو او ډاکترانو لهخوا زیاتې پیسې اخیستلو، تاریختېر شوي درملو، بېکیفیته درملو او د خصوصي روغتونونو لهخوا ناوړه ګټه اخیستلو سره مخ دي.
محترم شيخ الحديث مولوي عبدالحکيم شرعي د دغه وزارت او نورو نهادونو د ګډ پلاوي راپور ته چې دغه روغتونونه یې بررسي کړې وو، هم اشاره وکړه او ویې ویل چې ځینې روغتونونه یوازې د سوداګرۍ په موخه جوړ شوي او له ناروغانو څخه د زیاتو پیسو د ترلاسه کولو لپاره له هېڅ ډول اقدام ډډه نهکوي.
هغه توصیه وکړه چې ډاکتران او د خصوصي روغتونونو مسئولین دې مادياتو ته پام نهکوي او د خپلو هېوادوالو لاس د ورور په څېر ونیسي او تر خپلې وسې له هغوی سره مرسته وکړي.
له بلې خوا، د عامې روغتيا وزارت مالي او اداري معين، محترم ملا بخت الرحمن شرافت هم په یاده ناسته کې د خصوصي روغتونو لخوا د اضافه پیسو اخیستو راپور ته په اشارې سره روښانه کړه چې د عامې روغتیا وزارت د داسې شرایطو په برابرولو کې ده چې نه د خلکو او نه د روغتونونو په ضرر وي، خو له خلکو دا ډول زیاتې پیسې اخیستل او د تاریختېر شویو درملو پلورل د منلو وړ نه دي.
په دې ناسته کې د ځينو روغتونونو استازو هم خپلې ستونزې او ننګونې شريکې کړې او د عدليې وزير ډاډ ورکړ چې د اتحاديې له جوړېدو سره، په دې برخه کې اقدامات وشي.
