د تقنیني ستاژ د اتمې دورې د برنامې د نوم لیکنې د پیل په اړه د عدلیې وزارت خبرتیا
د جامعاتو او دیني مدرسو هغو فارغانو ته چې د هغوی سندونه د لېسانس په سویه د اړوندو مراجعو له خوا تایید شوي وي دي او همدا راز د امارتي او خصوصي پوهنتونونو د شرعیاتو او حقوقو پوهنځیو فارغانو ته خبر ورکول کېږي چې:
د تقنیني ستاژ د برنامې د اتمې دورې د ورودي ازموینې لپاره نوم لیکنه د ۱۴۴۶ هجري قمري کال د شعبان المعظم د میاشتې له ۲۵ نېټې چې د ۱۴۰۳ هجري شمسي کال د کب د میاشتې له ۵ نېټې سره سمون خوري پیل او د رمضان المبارک د میاشتې تر ۱۵ نېټې چې د روان کال د کب د میاشتې ۲۵ نېټې سره سمون خوري دوام کوي.
د اړتیا وړ مواد:
- په برنامه کې د شمولیت غوښتنلیک د فورمې بشپړول.
- د تابعیت د تذکرې رنګه کاپي.
- د لوړو زده کړو وزارت د تایید شوي دیپلوم او د نمرو ترانسکریپت رنګه کاپي.
- درې ۳/۴ عکسونه.
هغه داوطلب چې د شمولیت د غوښتنلیک د وړاندې کولو په وخت کې یې، د خپل فراغت دیپلوم نه وي اخیستی، کولی شي د خپل فراغت رسمي تصدیق د نمرو له ترانسکریپت سره د لوړو زده کړو وزارت په تایید سره، د لوړو زده کړو له نهاد څخه وړاندې کړي.
د ازموینې سرچينې:
- عقیدة الطحاوی
- مجلة الاحکام العدلیة (عمومي برخه)
- د اسلام د جزا حقوق ( عمومي او اختصاصي)
- د اسلام د حقوقو اساسات
- د حقوقو د علم مبادي
- عمومي بین المللي حقوق
- د عمومي جزا حقوق
داوطلبان کولی شي، د نوم لیکنې فورمه په حضوري ډول د عدلیې وزارت د قانون جوړونې د چارو عمومي ریاست د قوانینو د مطالعې، تشرېح او زده کړې له ریاست او یا د عدلیې وزارت له ( دغه ځای) څخه ترلاسه کړي. داوطلبان مکلف دي، پورته یاد شوي سندونه په پلاستیکي دوسیه کې د قانون جوړونې د چارو عمومي ریاست د قوانینو د مطالعې، تشریح او زده کړې ریاست ته وسپاري.
