د عدلیې محترم وزیر په افغانستان کې د اسلامي همکاریو د سازمان له سفیر سره وکتل
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د اسلامي همکاریو د سازمان سفیر او په افغانستان کې د یاد سازمان رئیس، ډاکټر محمد سعید آل عیاش او د هغه له مل پلاوي سره وکتل او خبرې ورسره وکړې.
دا کتنه د ربیع الاول د میاشتې په ۲۹ نېټه، نن د چهارشنبې په ورځ د عدلیې وزارت په مقر کې ترسره شوه او د تقنیني سندونو د پړاوونو تېرولو د څرنګوالي، د امر بالمعروف او نهی عن المنکر قانون، د شریعت لارښوونو د تطبیق او د یو لړ نورو موضوعاتو په اړه پکښې بحث او خبرې وشوې.
محترم مولوي عبدالحکیم شرعي د تقنیني سندونو د پړاوونو تېرولو په تړاو د اسلامي همکاریو د سازمان محترم سفیر ته معلومات وړاندې کړل ویې ویل چې، تقنیني سندونو د اړوندو ادارو لخوا تسوید کېږي او د عدلیې وزارت یاد شوي سندونه تدقیق او له فقهي سرچینو څخه تخریج کوي.
نوموړي د امر بالمعروف او نهی عن المنکر قانون چې په دې وروستیو کې د عالیقدر امیرالمؤمنین حفظه الله تعالی له لوري توشېح شوی، د هغه شرعي سرچینو او د یاد قانون د پلي کېدو څرنګوالي په اړه هم د اسلامي همکاریو د سازمان محترم سفیر ته معلومات ورکړل.
محترم محمد سعید آل عیاش اسلامي قوانین د اسلامي ټولنې له اړتیاو څخه وبلل او له افغانستان سره یې د یاد سازمان د همکاریو د دوام ډاډ ورکړ.
