د عدلیې وزارت د مدافع وکیلانو ریاست او د لوړو زده کړو وزارت د محصلانو د چارو ریاست ترمنځ د همغږۍ ناسته جوړیدل
د عدلیې وزارت د مدافع وکیلانو رئیس مولوي رحمت الله حقاني د لوړو زده کړو وزارت د محصلانو چارو رئيس کليم الله محمدي او د هغه له مل پلاوي سره وکتل او دواړو لورو د دواړو ادارو ترمنځ د همغږۍ او همکاریو په اړه خبرې وکړې.
په دې غونډه کې چې د روژې د میاشتې په ۳ نېټه د چهارشنبې په ورځ د عدلیې وزارت په مقر کې جوړه شوه د حقوقي زده کړو په کلينيکونو کې د همغږۍ، په دغو کلينیکونو کې د باتجربه مدافع وکيلانو له لوري د تدریس چارو مخته وړلو، نويو فارغانو ته د برنامې جوړولو په اړه د مشخص هوکړه لیک درلودلو د اړتیا او د مدافع وکيلانو د ستونزو په اړه هم بحث وشو.
د یادې غونډې په ترڅ کې د عدلیې وزارت د مدافع وکيلانو رئيس د لوړو زده کړو وزارت له راغلي پلاوي څخه غوښتنه وکړه، چې د هېواد د شرعياتو او حقوقو پوهنځیو په نصابونو کې د مدافع وکيلانو د کړنلارې تدریس اضافه شي او یاد پلاوي هم په دې هکله د همکارۍ ژمنه وکړه.
