د ځمکو د غصب د مخنیوي او د غصب شویو ځمکو د استرداد قانون په رسمي جریدې کې چاپ او خپور شو

د ځمکو د غصب د مخنیوي او د غصب شویو ځمکو د استرداد قانون چې د ۱۴۴۵ هجري قمري کال د صفرالمظفر د میاشتې په ۱۰ نېټې د امیرالمومنین حفظه الله له لوري توشیح او نافذ شوی د عدلیې وزارت له لوري د رسمي جریدې په ۱۴۳۸ ګڼې کې چاپ او خپور شو.

په دغه قانون کې څلور فصلونه او ۲۲ مادې شاملې دي او د امارتي ځمکو د غصب او د یادو ځمکو د استرداد قضیو څه رنګوالی، د رسیدګۍ مراجع او د ځمکو د غصب اړوند نور موارد په کې بیان شوي دي.

د یادونې وړ ده چې د رسمي جریدې په ۱۴۳۸ ګڼې کې د یاد قانون سربېره، د امیرالمومنین حفظه الله فرمانونه او د امارتي، عامه مرعی او وقفي غصب شویو ځمکو قضیو ته د رسیدګې اختصاصي محکمې شرعي اصولنامه هم چاپ او خپره شوې ده.

یاد شوی قانون د توشیح له نېټې څخه نافذ دی او په اساس یې، د ځمکو د غصب د مخنیوي مقرره چې مخکې نافذ شوې وه او د یاد قانون په مغایرت کې نور تقنیني سندونه ملغا ګڼل کیږي.

هیوادوال کولی شي یاد شوی قانون د عدلیې وزارت د خپرونو او عامه اړیکو له ریاست څخه ترلاسه کړي. دغه راز د یاد قانون الکترونیکي نسخه (PDF) هم د عدليې وزارت د ویب پاڼې د حکمونو او قوانینو په ډیټابیس کې موجود ده.

د ډانلود لېنک: http://old.moj.gov.af/Content/files/OfficialGazette/01401/OG_01438.pdf