لوګر ولایت ته د ځمکو د غصب د مخنیوي کمېسیون د مشرتابه پلاوي سفر
د ځمکو د غصب د مخنیوي او د غصب شویو ځمکو د استرداد کمېسیون مشرتابه پلاوي د عدلیې وزارت د سرپرست او د یاد کمېسیون د رئیس شیخ الحدیث مولوي عبدالحکیم شرعي په مشرۍ د ربیع الثاني د میاشتې په ۳ نېټې د چهارشنبې په ورځ د ځمکو د غصب اړوندو دوسیو د بررسۍ په منظور لوګر ولایت ته سفر وکړ او د دغه ولایت له مقاماتو او سیمه ییزو مسؤلینو سره یې وکتل او خبرې ورسره وکړې.
په دغه سفر کې د کور او ښار جوړولو د وزارت سرپرست مولوي حمدالله نعماني، د چارو د ادارې لوی رئیس شیخ الحدیث مولوي نورالحق انور، د کرنې او اوبو لګولو د وزارت معین مولوي فضل باري فضلي، د سترې محکمې استازی شیخ عبدالصمد حقاني او د امارت د قضایاو لوی رئیس او د یاد کمېسیون سکرتر مولوي احسان الله وثیق او د دغه کمېسیون نورو غړو د عدليې له وزیر سره ملګري وو.
د یاد کمېسیون مشرتابه د لوګر له والي او د دغه ولایت له نورو مقاماتو او سیمه ییزو مسؤلینو سره ناسته جوړه کړه او په هغې کې د ځمکو د غصب د مخنیوي او د غصب شویو ځمکو د استرداد په اړه بحث او خبرې وکړې.
په دغې ناسته کې، یاد شوي هیئت د ځمکو د غصب د مخنیوي په برخه کې د دغه ولایت د مشرتابه فعالیتونه او کړنې وستایلې او د ځمکو د غصب د مخنیوي مقررې او یو شمېر نورو مهمو ټکو په اړه لازم توضیحات وړاندې کړل.
د عدلیې وزارت سرپرست په یاده ناسته کې، دغه ولایت ته د کمېسیون د مشرتابه پلاوي د سفر موخې د لوګر ولایت د ځمکو د غصب د مخنیوي تخنیکي هیئت د فعالیتونو بررسي او ارزول، د ځمکو د غصب اړوندو دوسیو بررسي او د امارتي ځمکو تثبیت یادې کړې.
دغه راز نوموړي په ټولنې کې د فساد زیانونو او له هغه سره د مبارزې په اړه خبرې وکړې او د ځمکو د غصب د مخنیوي له تخنیکي هیئت سره په دغه ولایت کې د سیمه ییزو ادارو په همکارۍ او همغږۍ ټینګار وکړ. نوموړي د یاد ولایت د علماو له شورا او د حج او اوقافو ریاست څخه هم وغوښتل چې د ځمکو د غصب د مخنیوي په اړه خلکو ته پوهاوی ورکړي.
د لوګر والي مولوي ضیاالرحمن مدني دغه ولایت ته د یاد کمېسیون د مشرتابه پلاوي د راتګ هرکلی وکړ او له دغه کمېسیون او د لوګر ولایت د ځکمو د غصب د مخنیوي له تخنیکي هیئت سره یې د لا زیاتو همکاریو ډاډ ورکړ.
په دغې ناسته کې د یاد کمېسیون نورو غړو هم د امارتي ځمکو د غصب د مخنیوي په اړه خبرې وکړې ویې ویل چې د د ځمکو د غصب مخنیوی او د غصب شویو امارتي ځمکو استرداد د اسلامي امارت له لومړیتوبونو څخه دي او اسلامي امارت مصمم دی چې غصب شوې ځمکې بېرته له زورواکو څخه واخلي. هغوی په یاد ولایت کې د ځمکو د غصب د مخنیوي له تخنیکي هیئت سره د سیمه ییزو ادارو په همکارۍ ټینګار وکړ.
په یاده ناسته کې د لوګر ولایت مقاماتو او سیمه ییزو مسؤلینو هم د دغه ولایت له تخنیکي هیئت او د ځمکو د غصب د مخنیوي له کمېسیون سره د بشپړې همکارۍ ډاډ ورکړ.
د ځمکو د غصب د مخنیوي کمېسیون مشرتابه پلاوي په یاد ولایت کې د ځمکو د غصب اړوند یو شمېر دوسیې هم بررسي کړې او د یاد ولایت تخنیکي هیئت ته لازمې لارښوونې وکړې.
