په کندز ولایت کې د ۱۲۶ جریبه امارتي ځمکې تثبیت
د کندز ولایت د ځمکو د غصب د مخنیوي د تخنیکي هیئت ناسته د ربیع الاول د میاشتې په ۲۴ نېټې د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې او په دغه ولایت کې ۱۲۶ جریبه ځمکه امارتي تثبیت شوه.
په دغې ناسته کې د حضرت امام صاحب د ولسوالۍ د بابوس د شورتنک ساحې د ۲۶ جریبه ځمکې دوسیه او د چهاردرې ولسوالۍ د خلازيو اوسیدونکو عریضه، بحث او بررسۍ لاندې ونیول شوه او په پایله کې د شورتنک ساحې ۲۶ جریبه ځمکه امارتي تثبیت شوه او د ساحې د بررسۍ او د څېړنو بشپړولو په منظور له تخنیکي هیئت څخه یو ټیم توظیف شو ترڅو د هغې څېړنې بشپړې او راپور یې مرکزي کمېسیون ته واستول شي.
د تخنیکي هیئت رئیس او غړو د کوټه ګرد تپو د لمنو له ساحې څخه چې په سلګونه د هستوګنې کورونه پرې جوړ شوي هم لیدنه وکړه په یادې ساحې کې ۱۰۰ جریبه ځمکه شاملیږي، چې په پایله کې امارتي تثبیت شوه او د کادستر د سروې مدیریت ته لارښوونه وشوه چې یاده شوې ساحه سکیچ او کروکي کړي ترڅو موضوع د څېړنو له بشپړولو څخه وروسته مرکزي کمېسیون ته تحویل شي.
