د کابل ښاروالۍ د نهمې ناحيې له ریاست سره د عدلیې وزارت د حقوقي مرستو د ریاست د همغږۍ ناسته جوړیدل
د کابل ښاروالۍ د نهمې ناحيې له ریاست سره د عدلیې وزارت د حقوقي مرستو د ریاست د همغږۍ ناسته د ذوالحجې میاشتې په ۲۴ نېټه د چهارشنبې په ورځ د عدليې وزارت د حقوقي مرستو رئیس مولوي حافظ عبدالصمد عمري، د کابل ښار د نهمې ناحيې رئيس او د نوموړي مرستیالانو او د یادې ناحيې د ګذر وکیلانو په ګډون جوړه شوه.
دغه ناسته د کلام الله مجید د څو آیاتونو په تلاوت سره پیل شوه او د حقوقي مرستو رئیس د حقوقي مرستو او حقوقي پوهاوي ورکوونې برنامې او د ټولنې د ننګونو په حل کولو کې د هغې اهمیت په اړه خبرې وکړې، ویې ویل چې زموږ خلک بې وزله او بې وسې دي او باید له هغوی سره مرسته وشي او دغه کار د اسلامي امارت له مکلفیتونو څخه دی.
نوموړي زیاته کړه چې د عدليې وزارت مصمم دی ترڅو د وړیا حقوقي مرستو وړاندې کولو او د حقوقي پوهاوي ورکوونې برنامو جوړولو له لارې، د هیواد په کچه زموږ ګران ولس ته غوره خدمتونه عرضه کړي او په همدې منظور یې له بېلابېلو ادارو سره غونډې جوړې کړي او د دغو برنامو د تطبیق څرنګوالي او عام ولس ته د ګذر د وکیلانو له لارې د پیغام استولو په اړه بحث او د نظرونو تبادله ترسره کیږي.
په دغې ناسته کې، د کابل ښار ۲۲ ناحيې په استازیتوب د ګذر د وکیلانو رئیس د دغه ډول برنامو جوړول وستایل او خلکو سره يې تر ټولو ستره معنوي مرسته وګڼله. نوموړي خپل پوښتنې او وړاندیزونه هم مطرح کړل چې د عدليې وزارت د حقوقي مرستو رئیس له لوري واوریدل شول او هغو ته د قناعت وړ ځوابونه وړاندې شول.
