د کابل ښار له دارالوکالو څخه څارنه او کنټرول ترسره شو
د عدليې وزارت د مدافع وکیلانو د ریاست د نظارت ټیم غړو، د ذوالقعدې د میاشتې په ۲۹ نېټه د یکشنبې په ورځ د کابل ښار په نهمې او لسمې ناحیو کې څارنه او کنټرول ترسره کړ.
په دغه نظارت کې، ۲۳ دارالوکالې بررسي او کنټرول شوې چې له دې جملې څخه په ۲ دارالوکالو کې مدافع وکیل په خپله حضور نه درلود او نامسؤلو اشخاصو فعالیت درلود، د هغوی دفترونه وتړل شول او د هغو متصدیان د ځواب ورکولو له پاره عدليې وزارت ته وغوښتل شول.
دغه راز د څارنې په بهیر کې هغو مدافع وکیلانو ته چې د هغو د فعالیت ناحیه او لوحې له جوازلیکوونو سره سمون نه درلود، توصیې وشوې ترڅو ژر تر ژره د خپل دارالوکالو لوحې او د فعالیت ځای له خپلو جوازلیکوونو سره سم تنظیم کړي.
د عدليې وزارت د مدافع وکیلانو ریاست د مدافع وکیلانو له نوم او امتیاز او د هغو له دارالوکالو څخه د ناوړه ګټه اخیستنې له منځه وړلو په منظور، د مدافع وکیلانو د هر اړخیزې همکارۍ غوښتونکی دی.
