د نورستان ولایت له مشرانو او مخورو سره د عدلیې وزارت د سرپرست کتنه
د عدليې وزارت سرپرست او د ځمکو د غصب د مخنیوي او د غصب شویو ځمکو د استرداد کمېسیون رئیس شیخ الحدیث مولوي عبدالحکیم شرعي د ذوالقعدې د میاشتې په ۱۴ نېټه د شنبې په ورځ د نورستان ولایت له یو شمېر مشرانو او مخورو سره د یاد وزارت په مقر کې وکتل او خبرې ورسره وکړې.
په دغې ناسته کې، د امارت د قضایاو لوی رئیس مولوي احسان الله وثیق، د تقنین لوی رئیس مفتي فضل هادي صاحب زاده، د قوانینو د طرحې پروژې شیوخو او د نورستان ولایت ۲۰ تنو مشرانو او مخورو ګډون کړی وو.
په دغې ناسته کې، د نورستان ولایت مشرانو او مخورو د نورستان ولایت د څړځایونو او مالچرونو په اړه خبرې کړې، د یاد ولایت د اوسیدونکو ستونزې او غوښتنې د ځمکو د غصب د مخنیوي او د غصب شویو ځمکو د استرداد کمېسیون له رئیس سره شریکې کړې او د یاد ولایت جغرافیایي موقعیت په اړه یې د دغه کمېسیون رئیس ته معلومات وړاندې کړل.
د ځمکو د غصب د مخنیوي او د غصب شویو ځمکو د استرداد کمېسیون رئیس شیخ الحدیث مولوي عبدالحکیم شرعي د نورستان ولایت تخنیکي هیئت رئیس ته لارښوونه وکړه چې د نورستان ولایت د خلکو په همغږۍ هدیرې، جومات، روغتون او د خلکو نورو ضروري اړتیاو له پاره مناسبه ځمکه مشخصه کړي.
د ځمکو د غصب د مخنیوي کمېسیون رئیس د نورستان ولایت مشرانو او مخورو ته وویل چې د اسلامي امارت مقامات او مشرتابه د خلکو د غربت، مسکن او نفقې په فکر کې دي او هڅه کوي چې د خلکو ضرورتونه په غوره توګه حل کړي. نوموړي ژمنه وکړه چې د هدیرې، جومات، روغتون او د یاد ولایت د اوسیدونکو د نورو اړتیا له پاره به د ځای په تعیین کې له هیڅ ډول همکارۍ څخه ډډه و نه کړي.
