د پکتیا ولایت د تخنیکي هیئت په روحاني بابا ولسوالۍ کې له ځینو ساحو څخه لیدنه وکړه
د پکتیا ولایت د ځمکو د غصب د مخنیوي تخنیکي هیئت د شوال میاشت په ۱۲ نېټه د سه شنبې په ورځ د دغه ولایت د روحاني بابا ولسوالۍ ته ولاړ او له ځینو سیمو څخه یې لیدنه وکړه.
یاد شوي هیئت د روحاني بابا ولسوالۍ له ولسوال او نورو سیمه ییزو مقاماتو سره وکتل او د ځمکو د غصب د مخنیوي او د غصب شویو ځمکو د تثبیت په اړه یې خبرې وکړې او یادو سیمه ییزو مقاماتو له دغه هیئت سره د همکارۍ ژمنه وکړه.
تخنیکي هيئت له امنیتي ټیم سره د مموزیو، دیري او پوټي ساحو ته ولاړ او د غصب شویو ځمکو د تثبیت او تشخیص په برخه کې یې اقدام وکړ.
یاد هیئت په دغې ساحه کې نوي تصرفات د څېړنو تر بشپړولو او وروستۍ پریکړې پورې منع کړل او متصرفینو ته یې معلوماتي استعلامونه وویشل.
