د لغمان ولایت د تخنیکي هیئت ناسته جوړه شوه
د لغمان ولایت د ځمکو د غصب د مخنیوي تخنیکي هیئت ناسته د ۱۴۴۴ هجري قمري کال د شعبان میاشت په ۲۸ نېټه ددغه هیئت د رئیس او غړو په حضور سره جوړه شوه او یاد شوي هیئت د ځمکو د غصب د مخنیوي په برخه کې هم عملي اقدامات ترسره کړل.
دغې ناسته کې د مخکنۍ ناستې پریکړو څخه بیا کتنه وشوه او یاد شوي هیئت د تبلیغي مرکز له پاره د ۱۰۲ جریبه ځمکې د تثبیت او تشخیص په منظور ددغه مرکز له مسوولینو سره وکتل. دغه هیئت د یاد شوي مرکز له مسوولینو څخه د ځمکې د لیږ اړوند سندونه وغوښتل او د هغوی خبرې یې واوریدې.
هغوی اړوند سندونه تخنیکي هیئت ته وړاندې کړل چې له ارزونې څخه وروسته مشخصه شوه چې د یاد شویو سندونه کار له ولایت څخه بشپړ شوی خو په مرکز کې د چارو اداره هغه رد کړی او منظور شوی نه دی. هیئت وویل چې موضوع له مرکزي کمېسیون سره شریکیږي او د کمېسیون له لارښوونې سره به سم اجراآت وشي.
دغه هیئت له غونډې څخه وروسته ددغه ولایت د علینګار ولسوالۍ پړاويي ساحې ته هم سفر وکړ او دغې ساحه کې يې کادستري نقشه پر ۱۱۲ جریبه امارتي ځمکه تطبیق کړه او ددغې ځمکې له مدعیانو سره یې هم وکتل.
هیئت له هغوی څخه قانوني سندونه وغوښتل چې هغوی له دغې ځمکې څخه هیڅ ډول سند نه درلود او ویې منله چې یاده ځمکه عامه مرعی ده.
