کندهار ولایت کې ۷۰۰۰ جریبه ځمکه امارتي تثبیت شوه
د کندهار ولایت د ځمکې د غصب دمخنیوي تخنیکي هیئت ددغه ولایت ډنډ ولسوالۍ ته سفر وکړ او د امارتي ځمکو د تثبیت په برخه کې اقدام وکړ.
یاد هیئت د ډنډ ولسوالۍ روح آباد، منصور غونډۍ او ده رجب ساحو ته ولاړ او ۷۰۰۰ جریبه امارتي ځمکې يې پکې بررسي او تثبیت کړې. یادې شوې ځمکې د دریو اشخاصو لخوا غصب شوي او د تیلو یو ټانک هم پکې موجود دی. یاد هیئت له ځايي خلکو او ددغې ځمکې له متصرفینو سره وکتل او د غصب په اړه یې معلومات وړاندې کړل او ټینګار یې وکړ چې له غاصبینو سره به له قانون او شریعت سره سم چلند وشي.
یاد هیئت ددغو ځمکو له غاصبینو څخه سندونه وغوښتل چې اوس مهال یې هیڅ ډول سندونه نه درلودل. هغوی ژمنه کړه چې د اسلامي امارت اصولو ته به ژمن اوسي.
په همدې حال کې، د لغمان ولایت د تخنیکي هیئت ناسته ددغه هیئت د رئیس او غړو په حضور سره جوړه شوه او پکې ټینګار وشو چې غصب شوي ښارګوټي او پلانې ساحې باید له غاصبینو څخه آزدې کړل شي.
یاد هیئت د بلندمنزلو له یو شمېر غاصبینو سره وکتل او له هغوی څخه یې د معلوماتي استعلامونو په ترڅ کې ځینې پوښتنې مطرح کړې. دغه راز هیئت د بلند منزلونو له نورو مالکانو څخه یې قانوني سندونه وغوښتل او هغوی خپل سندونه وړاندې کړل چې بررسۍ لاندې ونیول شوو.
هیئت علینګار ولسوالۍ په پروايي ساحې کې د ۱۲۲ جریبه په اجارې ورکړل شوې ځمکې له دعوا کوونکو سره وکتل او هغوی ته یې استعلام ورکړ چې له دقیقې بررسۍ څخه وروسته به ددغې موضوع په اړه تصمیم ونیول شي.
