د معاملو د لارښوونې او د عریضې د لیکوونکو د اصولو د پوهاوي ورکوونې او د جوازونو د ویشلو سیمینار جوړیدل
د معاملو د لارښوونې او د عریضې د لیکوونکو د اصولو او لارښوود د پوهاوي ورکوونې او د جوازونو د ویشلو سیمینار د ۱۴۴۴ هجري قمري کال د شعبان میاشت په ۶ نېټه د یکشنبې په ورځ د عدليې وزارت د مسلکي معین شیخ الحدیث مولوي عبدالکریم حیدر او ددغه وزارت د انسجام د لوی ریاست د رئیسانو او د مسوولینو په ګډون جوړه شوه.
یاد سیمینار کې ګڼ شمېر د معاملو د لارښوونو او عریضې لیکوونکو د جواز درلودونکو او غوښتونکو ونډه اخیستې وه او د معاملو د لارښوونو او عریضې لیکوونکو اصول او لارښوود او د جواز د درلودونکو مکلفیتونه یې زده کړل.
په دغه سیمینار کې د عدليې وزارت مسلکي معین د موضوع په تړاو خبرې وکړې او د معاملو د لارښوونو او عریضې لیکوونکو د جواز درلودونکو او غوښتونکو څخه يې وغوښتل چې د عدليې وزارت لخوا ورکړل شوو اصولو او لارښود سره سم، عمل وکړي. دغه راز نوموړي له هغوی څخه وغوښتل چې له جعل کارۍ، تزویر او نورو ناقانونو اعمالو څخه ډډه وکړي.
دغه راز د عدليې وزارت مسلکي معین له هغوی څخه وغوښتل چې مسوولیت درک کړي او خلکو ته صادقانه خدمت وکړي. نوموړي د معاملو د لارښوونو او د عریضې لیکوونکو مسوولینو ته ډاډ ورکړ چې دغه وزارت هڅه کوي ترڅو هغوی له پاره لازمې قانوني او لازمې آسانتیاوې برابرې کړي.
په دغه سیمینار کې، د انسجام لوی رئیس مولوي رحمت الله حقاني هم خبرې وکړې او د معاملو د لارښوونې او د عریضې لیکنې د جواز درلودونکو او غوښتونکو څخه يې وغوښتل چې په خپل ژمنې وفا وکړي او خپل مسوولیتونه له قانون سره سم او په پوره امانت دارۍ او رښتینولۍ سره ترسره کړي.
په پای کې د معاملو د لارښوونو او د عریضې لیکنې د جواز غوښتونکو ته، د فعالیت جوازونه د مسلکي معین او د انسجام لوی ریاست د رئیسانو او مسوولینو پواسطه وویشل شوو.
