د ختیځ زون ولایتونو د عدلیې ریاستونو کارکوونکو له پاره د ښوونیز سیمینار جوړیدل
څلور ورځنی ښوونیز سیمینار د ختیځ زون ولایتونو د عدلیې ریاستونو آمرینو، مدیرانو او مسلکي کارکوونکو له پاره د رجب المرجب میاشت په ۲۱ نېټه د یکشنبې په ورځ د ننګرهار ولایت په عدليې ریاست کې جوړ شو.
یاد سیمینار کې چې د عدليې وزارت د بشري سرچینو د ریاست له لوري د ننګرهار ولایت په عدليې ریاست کې په لاره اچول شوی وو د ننګرهار، لغمان، نورستان او کنړ ولایتونو د عدليې ریاستونو ۲۶ تنو آمرینو، مدیرانو او مسلکي کارکوونکو ګډون کړی او اداري او مسلکي برخو کې ښوونیز موضوعات زده کړل.
دغه برنامه د رجب المرجب میاشت په ۲۴ نېټه د چهارشنبې په ورځ پای ته ورسېدله. ددغو مراسمو د پاي په مراسمو کې، د ننګرهار ولایت د عدليې رییس، د عدليې وزارت د بشري سرچینو د ریاست د ظرفیت لوړولو آمر او د یاد سیمینار ګډونوالو، ونډه اخیستې وه.
دغو مراسمو کې د عدليې وزارت د بشري سرچینو د ریاست د ظرفیت لوړولو آمر ددغه راز سیمینارونو جوړولو د اهمېت او ګټې او د عدليې وزارت د بشري سرچینو د ریاست د ظرفیت لوړولو د آمریت راتلونکي پلان په اړه خبرې وکړې او ویې ویل چې ددغه ډول سیمینارونو د جوړولو موخه خلکو ته د ښو خدمتونو وړاندې کول دي.
په همدې حال کې، د ننګرهار ولایت د عدليې رییس ددغه سیمینار له جوړونکو څخه قدرداني وکړه او ددغه سیمینار له ګډونکوونکو څخه یې وغوښتل چې د سیمینار له زده کړو څخه، د خپلو چارو په ښه والي کې ګټه پورته کړي. دغه راز نوموړي د یاد سیمینار له ګډونکوونکو څخه وغوښتل چې په لا زیات همت سره خلکو ته خدمت وکړي.
یاد سیمینار کې د ادارې او مدیریت اساسات، د پلان د طرحې او ترتیب څرنګوالي، د عدليې وزارت پېژندنه، اداري مراسلات او قضايي اصول نامه تدریس شوې. د سیمینار په پای کې ګډونکوونکو ته تصدیق پاڼې هم وویشل شوې.
