د کندوز ښار د هدیرې ۵۰۰ جریبه ځمکې موضوع د هیئت بررسۍ لاندې ونیول شوه
د کندوز ولایت د ځمکې د غصب د مخنیوي د تخنیکي هیئت ناسته د هیئت د رییس او غړو، د کندوز والي او د آلچین بلوڅو د کلي اوسیدونکو په حضور سره د ولایت په مقام کې جوړه شوه او پکې د کندز ښار د هدیرې ۵۰۰ جریبه ځمکې موضوع په اړه چې د یادو اوسیدونکو لخوا په زور غصب شوې بحث وشو.
یاده شوې ځمکه پخوانې نظام کې د ځمکو له ادارې څخه حج او اوقاف ته د مړو د تدفین په منظور لېږدول شوې وه چې د آلچین بلوڅو د کلي د اوسیدونکو لخوا غصب شوې ده.
تخنیکي هیئت په دغې ناسته کې د کمېسیون او امیرالمومنین حفظه الله د فرمان په اړه معلومات وړاندې کړل او د شریعت له مخې د غصب پایلې بیان کړې. د کندوز والۍ له هیئت سره د همکارۍ ډاډ ورکړ او د امیرالمومنین حفظه الله د فرمانونو پر اطاعت يې ټینګار وکړ.
په دغې ناسته کې د آلچین بلوڅو د کلي اوسیدونکو ساحه کې د کورونو جوړول د خپل اړتیا پر بنسټ یاد کړل او ويې ویل چې ډیر لګښتونه يې کړي او د خپل کورونو د نه ویجاړېدو غوښتونکي شوو.
هغوی وړانديز وکړ چې هدیره بل ځای ته ولیږدول شي او حاضر دي چې د خپل متصرفه ځمکو بيې ورکړي.
تخنیکي هیئت پریکړه وکړه چې موضوع له مرکزي کمېسیون سره شریکه شي ترڅو په اړه يې لازم تصمیمونه ونیول شي.
