د غور، پکتیکا او لوګر ولایتونو د تخنیکي هیئتونو د ناستو جوړیدل
د غور، پکتیکا او لوګر ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او یادو ولایتونو کې د یو شمېر غصب شوو ځمکو په اړه بحث او لازم تصامیم ونیول شول.
د غور ولایت د تخنیکي هیئت ناسته کې د کابل-غور دروازې د ځمکې په ساحه کې چې پشته وردک ها باندې شهرت لري بحث وشو او پریکړه وشوه چې متصرفین یې د امنیه قوماندانۍ لخوا احضار شي او موضوع لازیاته بررسي شي.
دغې ناسته کې، د غور مرکز کې د یو شخص د وقفي ځمکې سندونه بررسي شوو او پریکړه وشوه چې هغه شاهدان چې نوم یې سند کې یاد شوی حاضر شي. دغه راز د حاجي صحت او حاجي الله داد د هستوګنې د کور د ځمکې د ساحې په اړه پریکړه وشوه چې یو ټیم سیمه له نږدې وګوري او بررسي کړي.
په یاده ناسته کې په فیروز کوه ښار کې د تیلو د یو ټانک باره کې هم بحث وشو او پریکړه وشوه چې غونډو کې یاد ټانک د مالک د عدم حضور په دلیل، وتړل شي.
په همدې حال کې، د پکتیکا ولایت د تخنیکي هیئت په ناسته کې د یو لړ مهمو موضوعاتو په اړه بحث وشو او لازم تصمیم ونیول شو.
دغې ناسته کې د یو شمیر اشخاصو عریضې بررسي شوې او یوشمېره اشخاص هم د هیئت راتلونکې غونډې ته وغوښتل شول.
پر دې سربېره، د لوګر ولایت د تخنیکي هیئت ناسته کې، د امنیه وقوماندانۍ د مخدره توکو آمر ددغه ولایت د معتادینو د روغتون د پراختیا له پاره ځمکه وغوښتله.
دغې ناسته کې د پل علم مرکز کې د هوني سفلا، عمر آباد او د یار محمد کاریز د کلیو د ځمکو د هر اړخیزې بررسۍ موضوع په اړه بحث وشو او لازم تصمیمونه ونیول شول.
دغه راز په یاده ناسته کې د یو شمېر اشخاصو عریضې د څاګانو د کېندلو په تړاو بررسي شوې او پریکړه وشوه چې د کمېسیون تر امر ثاني پورې، هرډول کار او فعالیت په دغو ځمکو ودرول شي.
