کندهار د عینو میني ښارګوټي په اړه ناسته جوړه شوه
د کندهار ولایت د عینو میني ښارګوټي د چارو په اړه ناسته د ربیع الثاني میاشت په ۱۰ نېټه د عدلیې وزیر او د ځمکو د غصب د مخنیوي او د غصب شوو ځمکو د استرداد کمېسیون رییس شیخ الحدیث مولوي عبدالحکیم شرعي په مشرۍ جوړه شوه.
په دغې ناسته کې د کندهار والي حاجي یوسف وفا، د افکو کمپنۍ دو تنه شریکان محمود کرزی او حامد هلمندی، ښاروال، د حج او اوقاف رییس، د عدليې رییس، د کرنې او اوبولګولو رییس، د ښار جوړولو رییس، د استیناف څارنوالۍ رییس، مستوفي، د سوداګرۍ او پانګونې خونې رییس او د کندهار ولایت د اقتصادي شورا رییس او یو شمېر سوداګرو او تخنیکي انجنیرانو حضور درلود.
ناسته د کلام الله مجید د څو ایاتونو په تلاوت سره پیل شوه او په دوام کې یې د افکو کمپنۍ شریکانو او مسوولینو د عینو میني ښارګوټي په اړه هر اړخیزه بحث او خبرې وکړې او لازم معلومات یې شریک کړل.
وروسته له هغه د عدلیې وزیر او د ځمکو د غصب د مخنیوي او د غصب شوو ځمکو د استرداد کمېسیون رییس شیخ الحدیث مولوي عبدالحکیم شرعي په مشرۍ پریکړه وشوه چې د عینو میني ښارګوټي د خدمتونو د وړاندې کولو او د زیربناو د جوړیدلو بهیر سمدستي پیل شي او د دغه ښارګوټي اوسیدونکو له پاره خدمتونه وړاندې شي.
د ناستې په پای کې د کرنې رییس د عینو میني د اوسیدونکو د غوښتنې پر اساس د دغه ښارګوټي د خدمتونو د وړاندې کیدلو او د زیربنایي چارو د جوړیدلو پیل ته اشاره وکړه او ویې ویل چې د عینو میني موظفې کمېټې هم دغه راز پریکړه کړې وه.
