د پکتیا ولایت په زرمت ولسوالۍ کې درې موټر پلورنځي وتړل شول
د پکتیا ولایت د عدليې ریاست د ربیع الثاني میاشت په ۸ نېټه د پنجشنبې په ورځ د زرمت ولسوالۍ د امنیه قوماندانۍ په همغږۍ د دغې ولسوالۍ د موټر پلورنځیو څخه بررسي او نظارت ترسره کړ.
د دغې بررسۍ په پایله کې د بازار په ودانۍ کې د اتفاق موټر پلورنځۍ، د کلالګو په بازار کې د سلطان محمد موټر پلورنځۍ او د بازګل موټر پلورنځۍ چې د بدرالدین په بازار کې موقعیت لري، د جواز نشتوالي او د غیرقانوني فعالیت په دلیل مهرلاک او وتړل شول.
دغه د موټر پلورنځي د فعالیت قانوني جواز د ترلاسه کولو د بهیر تر پای پورې تړل شوي او د سرغړونې په صورت کې به له هغو سره قانوني چلند وشي.
