د عدلیې وزارت په واسطه د درملو د دوو واردونکو شرکتونو تر منځ د حقوقي دعوا حل
د اسلامي امارت د عدلیې وزارت مؤظف پلاوي د افغان سرجیکل شرکت او د افغان فارما شرکت ترمنځ دعوا چې له زیاتې مودې را په دې خوا روانه وه په ډیر لنډ وخت کې حل کړه او دغه قضیه یې پای ته ورسوله.
د افغان سرجیکل شرکت او د افغان فارما شرکت له څو کلونو را په دې خوا په ګلف فارموسیوتیکل (جلفار) کمپنۍ پورې اړوند د درملو انحصاري واردولو او د دغې کمپنۍ له لوګو څخه د ګټې اخیستنې پر سر حقوقي دعوا لرله.
د عدليې وزارت د امارت د قضایاو په ریاست کې د هغوی د دوسیې بررسۍ په منظور د دغه وزارت د داخلي پلټنې له ریاست څخه یو پلاوی وټاکه.
مؤظف پلاوي د هغوی دوسیه بررسي کړه او د بررسیو پایله ښیي چې د افغان فارما شرکت له هغه وروسته چې عربي متحده اماراتو له ګلف فارمو سیوتیکل (جلفار) کمپنۍ سره د هغوی قرار داد په ۲۰۱۸ زېږدیز کال کې فسخ شو په جعلی ډول یې د خپل شرکت په نامه د جلفار علامې او لوګو په ثبت اقدام وکړ او ۹۶۱ ګڼه رسمي جریده یې هم جعل کړه او له هغې څخه یې د ځان په ګټه د قضیې د پر مخ وړلو لپاره ګټه اخیستي ده له دې امله د افغان فارما شرکت په نامه د جلفار د علامې او لوګو ثبت په جعل او تزویري ډول ثبت موندلی دی او د افغان سرجیکل شرکت د جلفار کمپنۍ د درملو د واردولو اصلي مستحق دی.
د عدلیې وزارت د افغان فارما شرکت مسؤولین د جعل او تزویر په تور څارنوالۍ ته ورپيژندلي او د هغه شرکتونه یې د اړونده ادارو په مرسته تړلي دي.
