د عدلیې په وزارت کې د قرآنکریم د ختم مراسم پر ځای شول
د عدلیې په وزارت کې د قرآن عظیم الشان د ختم مراسم د دې وزارت د سرپرست شیخالحدیث مولوی عبدالحکیم شرعي، مسلکي معین شیخ عبدالکریم حیدر او د یو شمیر کارکوونکو په شتون پر ځای شول.
دغه مراسم د روان کال د وري د میاشتې په نهه ویشتمه د سه شنبي په شپه د ماسختن د لمانځه له ادا کولو څخه وروسته پرځای شول او د عدلیې وزارت سرپرست د قرانکریم حافظانو ته د مبارکې په ترڅ کې هغوي ته سپارښتنه وکړه چې د قرآنکریم په سم حفظ او تجوید او هم د دیني علومو په زده کړه کې هڅه او هاند وکړي.
هغه د عدلیې وزارت هغو رئیسانو او کارکوونکو ته چې د شپې لخوا په وزارت کې پاتې کېږي هم سپارښتنه وکړه چې خپل پنځه وخته لمونځونه په جماعت سره اداء کړی.
د عدلیې وزارت مسلکي معین شیخ عبدالکریم حیدر هم په خپلو خبرو کې د مسئولینو په عجز او تواضع باندې ټینګار وکړ او زیاته یې کړه چې مسئولین دې باید خپلو دیني او دنیوي مسولیتونو ته پاملرنه وکړي.
له بلې خوا هم د عدلیې وزارت د بهرنیو اړیکو رئیس د قرآن عظیم آلشان د ختم د مبارکې په ترڅ کې وویل چې موږ باید د الله تعالي د نعمتونو شکر اداء کړو.
