د عدلیې وزارت د مرکزي رئیسانو د اداري ناستې جوړول
د عدلیې وزارت د مرکزي رئیسانو اداري ناسته د چهارشنبې په ورځ، د ۱۴۰۱ د وري په ۲۴ مه د عدلیې وزارت د مسلکي معین شیخ عبدالکریم حیدر په مشرۍ جوړه شوه.
په دې ناسته کې د مرکزي او ولایتي رئیسانو لپاره د رسمي محافظینو، د عدلیې ریاستونو د محافظینو د ټاکلو، د عدلیې وزارت د ریاستونو د قوانینو د بررسۍ، د مدافع وکیلانو د مهمو ریاستونو د اړتیاوو د برابرولو، د ننګرهار ولایت د مدافع وکیلانو د اجناسو موضوع، د جواز له ورکړې څخه مخکې د مدافع وکیلانو څخه د ازموینې د اخیستلو، د آنلاین اداري درسونو، په شخصي پوهنتونونو کې د کارکوونکو د زده کړو، د تقنین د ستاژ د دورې د درسونو د پیلولو، د محصلینو د معاش او آمرینو او مدیرانو ته د وسلې د حمل جواز ورکولو په اړه چې د مجاهدینو له جملې څخه دي د عدلیې وزارت ته بحث وکړ او نظر یې تبادله کړ.
په دې ناسته کې یو ۵ کسیز پلاوی موْظف شو تر څو د امنیت، درجې او د هر ولایت د مراجعینو شمېر ته په کتو د ولایتونو د عدلیې ریاستونو د ساتونکو شمېر مشخص کړي. همداراز پرېکړه وشوه چې د عدلیې رئیسان دې خپل ساتونکي په خپله وټاکي او په هغه صورت کې چې رئیسان ساتونکي ونلري د کورنیو چارو وزارت ورته ساتونکی ټاکي.
همداراز د آنلاین اداري زده کړو د پیل په اړه پرېکړه وشوه چې ډېر ژر د دې برخې د استادانو تش بستونه اعلان ته وسپاري. د غونډې غړو د تقنین د ستاژ د دورې د درسونو د پیل په اړه هم یوه کمېټه وټاکله تر څو د تقنین د ستاژ د دورې درسي نصاب له شرعي، عقیدتي او د اسلامي امارت د پالیسۍ له لحاظه وڅېړي.
په دې ناسته کې پرېکړه وشوه هغه آمرین او مدیران چې د مجاهدینو له جملې څخه دي، وزارت ته دې د وسلې د حمل جواز ورکړل شي. همداراز پرېکړه وشوه چې د عدلیې وزارت د ریاستونو د قوانینو د بررسۍ کار، د مدافع وکیلانو د ریاست د اړتیاوو برابرول، د ننګرهار ولایت د مدافع وکیلانو د اجناسو موضوع او د کارکوونکو زده کړه په هغو شخصي پوهنتونونو کې چې مخکې پیل شوې او تر یوه حده پورې پرمخ تللي، ډېر ژر باید بشپړ شي.
