د قندهار ولایت له عدلیې ریاست څخه د عدلیې وزارت د پلاوي لیدنه
د ولایتونو له عدلیې ریاستونو څخه د لیدنې او څارنې په لړ کې، د عدلیې وزارت د مالي او اداري رئیس مفتي فضل هادي صاحب زاده په مشرۍ د بېلا بېلو ادارو له رئیسانو او استازو څخه جوړ یو پلاوی د ۱۴۰۱ د وري په ۸ مه د دوشنبې په ورځ قندهار ولایت ته سفر وکړ.
دغه پلاوي، په لومړي سر کې د دې ولایت د عدلیې ریاست بېلا بېلې څانګې ولیدلې او د دې ریاست د کارکوونکو د مسلکي او اداري اجراآتو څرنګوالی و څاره او وڅېړه. یاد پلاوي ددې ریاست د کارکوونکو ستونزې واوریدلی او د هغو د حل په منظور هغوی ته یې لازمې سپارښتنې وکړلی.
همداراز یاد پلاوي د قندهار ولایت د والي مرستیال مولوي حیات الله مبارک سره ولیدل او د ځای کموالي او لېږدوونکې واسطې د نشتوالي په برخه کې د عدلیې ریاست ستونزې او همداراز یې له نوموړي سره د حقوقو او د امارت د قضایاوو د آمریتونو ستونزې شریکې کړې.
همداراز یاد پلاوي په ولسوالیو کې د حقوقو د مدیریتونو د فعالولو په برخه کې ددې ولایت له مقام څخه د همکارۍ غوښتونکی شو.
د قندهار والي مرستیال ژمنه وکړه چې د عدلیې ریاست ستونزو ته به رسیدګي وکړي.
