کندز ولایت کې ۱۵ زره جریبه ځمکه استرداد شوه
د کندز ولایت د ځمکې د غصب د مخنیوي د کمېسیون تخنیکي هیئت په دوه یمې کاري ورځې کې د قلعه ذال له ولسوال او ددغې ولسوالۍ له سیمه ییزو خلکو له کتنې او خبرو څخه وروسته، د ۱۵ زره جریبه ځمکې د استرداد کار پیل کړ.
دغه هیئت د قلعه ذال ولسوالۍ کلوخ تپه، بغري کول، باغیچه او خوش تپه سیمو ته ولاړ او ۱۵ زره جریبه امارتي ځمکه یې چې د خلکو تر تصرف لاندې وه، استرداد کړه.
یاد هیئت، ځایي اوسیدونکو ته له قانون او کړنلارې سره سم د دولت د عوایدو د زیاتېدو په منظور د ځمکې د اجارې وروکولو آمادګي اعلام کړه.
ځايي خلکو د اسلامي امارت د تصمیمونو هرکلی وکړ او د اسلامي امارت د اصولو د پیروۍ ژمنه یې وکړه. هغوی د امارتي ځمکو د اجارې نیولو له پاره خپل آمادګي اعلام کړه.
په همدې حال کې، د فاریاب ولایت د تخنیکي هیئت ناسته هم ددغه هیئت د رییس او غړو په حضور سره جوړه شوه او دغه ولایت کې له ځینو سیمو څخه لیدنه وشوه.
په دغې ناسته کې، د میمنې ښار په صیاد رجب کلي کې پر یوې امارتي ځمکې (ځنګل) د تعرض په اړه چې د کرنې ریاست اړوند ده بحث وشو او یاده سیمه له نږدې وکتل شوه. هیئت د کادستر مسوول ته لارښوونه وکړه چې یاده سیمې کروکي او تثبیت کړي او د هغې راپور وړاندې کړي.
د کلي د اوسیدونکو په وینا، د یادې سیمې دوسیه د ۱۴۰۰ کال د کب میاشت په ۲۷ نېټه په جریان کې اچول شوې وه او اوس مهال د فاریاب په ښاري محکمې تر دوران لاندې ده.
