په کندز ولایت کې څه باندې د ۱۰۳ جریبه امارتي ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۱۵ نېټې د دوشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په یاده ناسته کې، د دشت ارچي ولسوالۍ د مرکز ساحې د ۷ جریبه ځمکې دوسیه، د لاله میدان ساحې د ۹۱ جریبه ځمکې دوسیه او د انګور باغ ساحې د ۵ جریبه ځمکې دوسیه بحث او بررسۍ لاندې ونیول شوې او یادې ځمکې د هغو د متصرفینو د اعتراف په اساس امارتي تثبیت او استرداد شوې.
یاد شوي هیئت لارښوونه وکړه چې د دشت ارچي ولسوالۍ د مرکز ساحې د ۷ جریبه ځمکې او د انګور باغ ساحې د ۵ جریبه ځمکې د اجارې ورکولو بهیر د هغو له غیر شرعي ذوالید سره له پړاوونو څخه تېر شي او د لاله میدان ساحې د ۹۱ جریبه ځمکې دوسیه د تاییدي په غرض مرکزي کمېسیون ته واستول شي.
دغه راز په یاده ناسته کې د امام صاحب د ولسوالۍ د قلم ګذر ساحې د ۲۰ جریبه ځمکې دوسیه بحث او بررسۍ لاندې ونیول شوه او امارتي تثبیت شوه د کلباد ولسوالۍ د غرو ساحې دوسیې په تړاو هم لازم تصمیمونه ونیول شول.
