په کابل ولایت کې د غیر قانوني فعالیت په دلیل د معاملو د لارښوونې او د موټرپلورنځیو ۱۴۴ دفترونه وتړل شول
د عدليې وزارت په تېرو ۳ میاشتو کې د کابل ولایت په ښار او ولسوالیو کې د معاملو د لارښوونو او موټر پلورنځیو له دفترونو څخه د دوامداره نظارت سره د معاملو د لارښوونې ۱۴۴ دفترونه د غیر قانوني فعالیت په دلیل تړلي دي.
د دغو ۳ میاشتو په لړ کې د کابل ولایت په اتمه، اولسمه، یوولسمه ناحیو او په قره باغ ولسوالۍ کې د معاملو د لارښوونې او د موټر پلورنځي له ۷۸۱ دفترونو څخه نظارت او بررسي شوې چې د هغوی د ۱۴۴ دفترونو فعالیتونه غیرقانوني تثبیت شوي او پاتې نورو باندې هم ټینګار شوی چې له قانون سره سم فعالیت ترسره کړي.
دغه راز د دغې مودې په لړ کې ۲۷۸ عریضه لیکوونکي هم نظارت او بررسي کړي او سرغړونکو ته یې توصیه کړې چې وروسته له دې د عریضه لیکونکو له قانون سره سم فعالیت ترسره کړي.
یاد نظارت او بررسي د ګرانو هېوادوالو د فریب او سرګردانۍ د مخنیوي، د غیرقانوني او د خپلسرو فعالیتونو څخه د مخنیوي، د ملي عوایدو لوړولو، د مالیاتي فرار (اختلاس) او پټولو څخه د مخنیوي او د معاملو د لارښوونې د جواز رسمي کولو په منظور ترسره شوي دي.
دغه فعالیتونه د معاملو د لارښوونو او عریضه لیکونکو د بررسۍ او نظارت امریت له لوري، چې د معاملو د لارښوونو او د عریضې لیکونکو د ریاست په چوکاټ کې یو نوی رامنځ ته شوی امریت دی ترسره شوي دي.
