په پکتیا ولایت کې د کورونو د کرایې کنټرول په موخه د ګډې کمېټې ناسته جوړه شوه
په پکتیا ولایت کې د کورونو د کرایې کنټرول ګډې کمېټې د ربیعالآخر د مياشتې په ۵ مه نېټه د یکشنبې په ورځ، د یاد ولایت د عدلیې رئيس مولوي فاتح الله فاتح په مشرۍ او د اړوندو ادارو د استازو په ګډون یوه ناسته جوړه کړه.
په دې ناسته کې د عدلیې رئیس د پیل وينا وکړه او د خپلو خبرو په ترڅ کې یې زياته کړه چې دا کمېټه د پکتيا ولایت د اوسېدونکو د حقوقو خونديتوب، د کورنو د کرایې کنټرول او په دې برخه کې د خلکو شکايتونو ته د رسېدنې په موخه جوړه شوې ده.
دغه راز، په دې ناسته کې د کورونو د کرایې کنټرول د څرنګوالي په اړه بحث وشو او په راتلونکې کې په اړوندو برخو د اجرااتو په ترسره کېدو پرېکړې وشوې.
د کورونو د کرایې کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
