په هرات ولایت کې د معاملاتو لارښوونې له يو شمېر دفترونو څخه نظارت ترسره شو
د هرات ولایت د کورونو د کرایې د کنټرول ګډې کمېټې، د جمادیالآخرة د مياشتې په ۴ مه نېټه د سهشنبې په ورځ د هرات ښار په څلورمه ناحيه کې د معاملاتو لارښوونې له ۹ دفترونو څخه نظارت ترسره کړی.
په دې نظارت کې د یادو دفترونو رسمي سټې، د فعاليت جوازونه، د پیر او پلور قانونيتوب او یو شمېر نور اړين سندونه بررسي شوو چې په ترڅ کې یې متصديانو ته توصیه وشوه چې د هغو کورنو او ودانیو له ثبت کولو څخه ډډه وکړي چې د هغو کرایه د ۱۴۰۳ کال په پرتله له لس سلنې څخه لوړه شوې وي.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
