په ننګرهار کې په سلګونو جریبه ځمکه د غاصبینو څخه راوګرځول شوه
په هېواد کې د اسلامي امارت له حاکمیت وروسته د عدلیې وزارت توانېدلی،چې په ننګرهار ولایت کې په سلګونو جریبه امارتي ځمکه له غاصبینو څخه راوګرځوي.
د تېرو شلو کلونو په اوږدو کې په ننګرهار ولایت کې نږدې۲۸۶زره جریبونو په اندازه ځمکه د جلال آباد ښار او د ننګرهار ولایت په ۲۱ ولسوالیو کې د غاصبینو او زورواکو لخوا غصب شوې ده.
چې له نېکه مرغه د اسلامي امارت له حاکمیت وروسته د عدلیې وزارت د امارت د قضایاوو ادارې په هڅو او کوښښونو سره د ننګرهار ولایت په بهسودو ولسوالۍ او د نوموړي ولایت دویمې ناحیې اړوند ۵۱۴.۵ جریبه ځمکه چې د کانال ریاست اړوند وه، د غاصبینو څخه راګرځول شوې او نوموړې ادارې ته سپارل شوې ده.
همدارنګه د اوس لپاره ۴۲ نورې دوسیې چې ۱۷۰ جریبه ځمکې د غصب په تړاو دي،د محاکماتي څېړنې لاندې دي او د ورته نورو غصب شوي املاکو څېړنې هم دوام لري.
